گڏيل قومون -15 اپريل (اي پي پي) ايران اسرائيل ڇڪتاڻ تي گڏيل قومن جي سلامتي ڪائونسل هنگامي اجلاس منعقد ڪيو جنهن ۾ سفارتڪارن خطي ۾ تڪرارن جي پکڙجڻ کي روڪڻ لاءِ سڀني ڌرين کي صبر کان ڪم وٺڻ جي اپيل ڪئي آهي. گذريل ڏينهن منعقد سلامتي ڪائونسل جي اجلاس ۾ اسرائيل ۽ ايران ٻنهي جي نمائندن پڻ شرڪت ڪئي، جن هڪٻئي جي ملڪن تي دهشتگرد ڪارروائين جا الزام لڳايا. ايران جي سفير امير سعيد ايراواني چيو ته اسرائيل طرفان سفارتي ڪمپائونڊ تي حملي کان پوءِ ايران کي پنهنجي دفاع جو حق حاصل آهي. هن چيو ته ايران خطي ۾ ڇڪتاڻ يا جنگ نه ٿو چاهي پر جيڪڏهن سندس مفادن، عوام يا قومي سلامتي تي حملو ٿيو ته هو اهڙي ڪنهن به خطري يا جارحيت جو ڀرپور طريقي سان ۽ عالمي قانون مطابق جواب ڏيندو. آمريڪا ۽ ايران چيو ته هو هڪ ٻئي سان جنگ نه ٿا چاهين پر جيڪڏهن ڪو هڪ ملڪ ٻئي جي مفادن تي حملو ڪري ٿو ته هو ان جو دفاعي جواب ڏيندا.گڏيل قومن ۾ آمريڪي نمائندي رابرٽ ووڊ سلامتي ڪائونسل کي ٻڌايو ته آمريڪا ڇڪتاڻ ۾ اضافو نه ٿو چاهي، اسان جا قدم دفاعي نوعيت جا آهن، آمريڪا جو مقصد غزه ۾ ڇڪتاڻ ۽ تڪرار کي ختم ڪرڻ آهي. هن چيو ته آمريڪا ڪائونسل ۾ ايران خلاف وڌيڪ قدم کڻڻ جو منصوبو جوڙيو آهي ۽ 15 رڪني باڊي کان مطالبو ڪيو آهي، ته اها ايران جي قدمن جي غير واضح طور تي مذمت ڪري. گڏيل قومن ۾ روس جي سفير چيو آهي، ته 14 اپريل جي رات جو جيڪو ڪجهه ٿيو اهو خلا ۾ نه پر حقيقت ۾ هو، چين جي سفير ڊاءِ ونگ سلامتي ڪائونسل کي وڌ کان وڌ پرسڪون ۽ صبر کان ڪم وٺڻ جو مطالبو ڪندي چيو آهي ته فوري جنگ بندي لاڳو ڪرڻ اولين ترجيح آهي. شام جي سفير چيو ته وچ اوڀر ۾ ڇنڇر رات جيڪو ڪجهه ٿيو آهي اهو بار بار جارحيت ۽ عالمي قانونن ۽ گڏيل قومن جي چارٽر جي سنگين ڀڃڪڙين جو فطري ۽ اڻٽٽ نتيجو هو، هن چيو ته اهي ڀڃڪڙيون خطي ۾ آمريڪا جي لامحدود حمايت سان ڪيون ويون ۽ اسرائيل جي قابض اختيارين کي غلطي سان اهو يقين ڏيارڻ تي مجبور ڪيو ويو ته هو گڏيل قومن، عالمي قانونن، ۽ گڏيل قومن جي ٺهرائن کان مٿانهون آهي ۽ هو ڪنهن حملي جي جواب ۽ نتيجن کان آجو هوندو. شام جي سفير منافقت ۽ ٻٽي معيار جي خاتمي جو مطالبو ڪندي چيو ته سندس ملڪ خطي ۾ وڌيڪ حملن ۽ ڇڪتاڻ جو ذميوار آمريڪي انتظاميه ۽ اسرائيل کي سمجهي ٿو. کين اسان جي خطي ۽ اسان جي عوام خلاف پنهنجي تباهه ڪن پاليسين تي نظرثاني ڪرڻ گهرجي، کين خطي ۾ پنهنجي سرگرمين کي درست ڪرڻو پوندو، ڇاڪاڻ ته اسان جي خطي جو تمام گهڻو نقصان ٿيو آهي، وڌيڪ عالمي برادري کي اسرائيلي قبضا ختم ڪرڻ سان گڏوگڏ غزه جي عوام کي ڄاڻي واڻي بک وگهي مارڻ کان روڪڻ لاءِ فوري قدم، غزه م انساني همدردي جي بنياد تي امداد جي مڪمل رسائي کي يقيني بڻائڻ ۽ شام ۾ آمريڪي فوجي جٿن جي ناجائز وجود کي ختم ڪرڻ گهرجي.
