پاڪستان ٺهڻ ۾ اقليتن ڀرپور ڪردار ادا ڪيو، اقليتي برادري ملڪي ترقي لاءِ هر شعبي ۾ پنهنجون خدمتون سرانجام ڏئي رهي آهي، اڄ جو ڏينهن ملهائڻ جو مقصد پنهنجن بزرگن جي عهد تي قائم رهندي، اقليتن جي حقن جي تحفظ کي ورجائڻ آهي: محمد شهباز شريف

لاهور -11 آگسٽ (اي پي پي) وزيراعظم محمد شهباز شريف چيو آهي، ته پاڪستان ٺهڻ ۾ اقليتن پنهنجو ڀرپور ڪردار ادا ڪيو آهي، اقليتي برادري ملڪي ترقي لاءِ هر شعبي ۾ پنهنجون خدمتون سرانجام ڏئي رهي آهي، اڄ جي ڏينهن ملهائڻ جو مقصد پنهنجي بزرگن جي عهد تي قائم رهندي اقليتن جي حقن جي تحفظ کي ورجائڻ آهي، اسرائيل طرفان غزه ۾ ظلم جو مثال دنيا جي تاريخ ۾ نٿو ملي، فلسطين ۾ اسرائيلي ظلم ۽ ڏاڍ تي عالمي خاموشي افسوسناڪ آهي، دنيا غزه ۾ جنگبندي ۾ پنهنجو فعال ڪردار ادا ڪري. هن اهڙو اظهار ماڊل ٽائون لاهور ۾ اقليتن جي قومي ڏينهن جي حوالي سان رٿيل تقريب کي خطاب ڪندي ڪيو. ان موقعي تي سڌ سماءَ وارو وفاقي وزير عطاالله تارڙ، قانون ۽ انصاف وارو وفاقي وزير سينيٽر اعظم نذير تارڙ، مذهبي معاملن وارو وفاقي وزير چوڌري سالڪ حسين، مسلم ليگ (ن) جو اڳواڻ خواجه سعد رفيق، قومي اسيمبلي جو ميمبر نيلسن عظيم ۽ اقليتي اڳواڻ به موجود هئا. وزيراعظم چيو ته اڄ اسان سڀئي هتي گڏ ٿيا آهيون ۽ اقليتن جو ڏينهن ملهائي رهيا آهيون، پاڪستان ٺهڻ ۾ اقليتن پاڪستان لاءِ پنهنجو ووٽ ڏنو، اسان يوم آزادي ملهائي رهيا آهيون، پر بدقسمتي سان جيڪو ظلم ۽ ڏاڍ غزه جي فلسطين تي ٿي رهيو آهي، ان سان اسان جون خوشيون ڌنڌلائجي ويون آهن، غزه ۾ مظلوم مسلمانن سان اسرائيلي فوج گذريل ڏينهن فجر وقت بمباري ڪري عورتن ۽ ٻارن سميت مظلوم مسلمانن کي شهيد ڪري ڇڏيو، انهن ظلمن تي سڄي دنيا جي خاموشي افسوسناڪ آهي، ان حوالي سان دنيا ۾ امن جي قيام لاءِ قائم ڪيل عالمي ادارن جي ٺهرائن جي رتي برابر به حيثيت ناهي رهي، غزه ۾ جنگبندي ۽ دنيا ۾ امن جي قيام لاءِ اسرائيل کي اڳرائي کان روڪڻ لاءِ پنهنجو ڪردار ادا ڪرڻ گهرجي. وزيراعظم محمد شهباز شريف ملڪي ترقي ۾ اقليتن جي ڪردار جي حوالي سان ذڪر ڪندي چيو ته ملڪ خداداد پاڪستان عظيم قربانين کان پوءِ وجود ۾ آيو آهي، قيام پاڪستان ۽ ملڪي ترقي ۾ اقليتن جي مثبت ڪردار کي وساري نه ٿو سگهجي. عيسائي، هندو، سک، پارسي ۽ ٻين اقليتن سان تعلق رکندڙ ماڻهو زندگي جي مختلف شعبن ۾ خدمتون سرانجام ڏيندي ملڪي ترقي ۽ تعمير ۾ پنهنجو ڀرپور حصو وڌو آهي. اقليتن هميشه ملڪ جي ترقي ۽ خوشحالي لاءِ اڳتي وڌي پنهنجو فرض ادا ڪيو. چاهي اهي مسيحي برادري هجي، هندو برادري هجي، سک هجي يا پارسي برادري انهن سڀني ملڪ اندر پرامن شهري بڻجي حقيقي معنائن ۾ پاڪستاني هئڻ جو ثبوت ڏنو. مسيحي برادري جا مشينري اسڪولز جتي 77 سالن ۾ هزارين نه پر لکين ڇوڪرن ۽ ڇوڪرين اعليٰ تعليمي حاصل ڪئي. اهي مسيحي برادري جي پاڪستان لاءِ امن وقت شموليت آهي، جنگ جي زماني ۾ ڪير نه پيو ڄاڻي ته سيسل چوڌري جون ڇا خدمتون هيون، اقليتي برادري سان تعلق رکندڙ ججز انصاف جو مانُ مٿانهون ڪرڻ لاءِ ڀرپور خدمتون انجام ڏنيون. سک برادري پاڪستان جي استحڪام ۽ ترقي لاءِ هميشه ڀرپور خدمتون سرانجام ڏنيون آهن، پارسي برادري واپار ۽ ڪاروبار ۾ پنهنجو نالو ڪمايو. هن چيو ته گنگا رام اسپتال مان اڄ به ماڻهو فائدو حاصل ڪري رهيا آهن، جيستائين هي اسپتال قائم رهندي، ڏکويل انسانيت جي حوالي سان ماڻهو هميشه ان کي ياد رکندا، جيستائين اسپتال قائم رهندي هتي ڏکويل انسانيت جي علاج جي حوالي سان ماڻهو هن کي ياد رکندا، اهڙي ريت ڊاڪٽر روٿ فائو ڪوڙهه جي مرض ۾ مبتلا مريضن جي اميد جو ڪرڻو بڻجي پنهنجي سڄي زندگي انهن مريضن لاءِ وقف ڪري ڇڏي جيڪا ٻين لاءِ مشعل راهه آهي. ملڪ ۾ دهشتگردي جي خاتمي ۽ امن جي قيام لاءِ مختلف سيڪيورٽي ادارن ۾ مختلف اقليتن سان تعلق رکندڙ هن ڌرتي جا پٽ ۽ ڌيئرون پنهنجون خدمتون سرانجام ڏئي رهيا آهن. هن چيو ته پاڪستان ۾ اقليتن کي مڪمل آزادي حاصل آهي، اڄ جي ڏينهن قائداعظم محمد علي جناح تاريخي بيان ڏنو هو ته پاڪستان ۾ رهندڙ سمورين برادرين کي آئين ۽ قانون موجب برابري جا حق حاصل هوندا ۽ مڪمل مذهبي آزادي حاصل هوندي، جيڪڏهن ڪو مسلمان آهي ته اهو مسجد ۾ نماز ادا ڪرڻ ۾ پوري ريت آزاد هوندو، جيڪي اقليتون آهن اهي مندر وڃن، ڪليسا وڃن، گوردوارن ۾ وڃن کين مڪمل آزادي هوندي. هن تاريخي پس منظر جي روشني ۾ اڄ جي ڏينهن هتي گڏ ٿيڻ جو مقصد اسان کي پنهنجي بزرگن جي عهد تي قائم رهندي اقليتي برادري جي هر ممڪن تحفظ کي ورجائڻو آهي. وزيراعظم چيو ته ماضي ۾ اقليتن جي حوالي سان ڪجهه ڏکوئيندڙ واقعا پيش آيا جنهن سان کيس تڪليف پهتي جڏهن ته انهن واقعن کان پوءِ ان زماني جي حڪومتن ڀرپور ڪردار ادا ڪيو ته جيئن ٻيهر اهڙي ريت جا واقعا پيدا نه ٿين. هن چيو ته هتي اقليتي برادري جي نمائندن پنهنجي پاڪستان سان لازوال ۽ اڻ مٽ ڪميٽمينٽ جو اظهار ڪيو آهي، جنهن کي پاڪستاني قوم قابل تحسين نظر سان ڏسي ٿي، اتي اسان جي تاريخ ۾ ڪجهه ڏکوئيندڙ واقعا ٿيا آهن، جن مان ظاهر آهي تڪليف پهتي ۽ انهن اندر خوف جو احساس پيدا ٿيو. انهن واقعن کان پوءِ ان زماني جي حڪومتن ڀرپور ڪردار ادا ڪيو، جن قانون هٿ ۾ کنيو انهن کي قانون جي ڪٽهڙي ۾ وٺي آيا، مان سمجهان ٿو ته اقليتي برادريون جيڪي پاڪستان ۾ رهن ٿيون، انهن جي تحفظ ۽ سيڪيورٽي لاءِ وفاقي حڪومت ۽ صوبائي حڪومتون پنهنجي طور جيترا به قدم کڻن اهي گهٽ هوندا. هن چيو ته هي تمام پري جي ڳالهه ناهي، جڏهن هتي دهشتگردي جا واقعا ٿيا ان ۾ اسان جي اقليتي آفيسرن ۽ سپاهين پنهنجي جانين جو نذرانو پيش ڪيو. مان پاڻ جي ايڇ ڪيو ويس ۽ انهن جي اعزاز ۾ تقريب ۾ شامل ٿيس. هن چيو ته ڊاڪٽر روٿ فائو جهڙي عورت سڄي عمر پاڪستان ۾ زندگي بسر ڪري ڇڏي ۽ ڪوڙهه جي مرض لاءِ پنهنجي زندگي وقف ڪئي. پاڪستان جي اسپتالن ۾ جتي مسلمان ڊاڪٽرز ۽ نرسون ڪم ڪري رهيون آهن، اتي اسان جي اقليتي برادري جا نرسز ۽ ڊاڪٽرز به پنهنجون خدمتون ڏکويل انسان لاءِ سرانجام ڏينديون آهن. کين اهو به ياد رکڻ گهرجي ته انهن جي تحسين به ڪرڻ گهرجي ته جيئن انهن جي حوصلا افزائي ٿئي ۽ هو پهرين کان وڌيڪ ڪمٽمينٽ سان پاڪستان جي خدمت ڪن. هن چيو ته قائد محمد نواز شريف جي اڳواڻي ۾مسلم ليگ (ن) جي موجوده حڪومت اقليتن کي بنيادي حقن جي فراهمي لاءِ هر ممڪن قدم کنيا آهن، اقليتن جي تحفظ لاءِ وفاقي ۽ صوبائي سطح تي سيڪيورٽي جا سخت انتظام ڪيا ويا. محمد نواز شريف هر فورم تي اقليتن جي حقن جي تحفظ جي ترجماني ڪئي آهي. هن چيو ته مان اوهان کي يقين ڏياريان ٿو ته حضرت قائداعظم محمد علي جناح ۽ علامه محمد اقبال جي فرمانن جي روشني ۾ اوهان جي حقن لاءِ پوري طرح ڪوششون جاري رکيون وينديون ۽ اقليتن کي درپيش مسئلن جي حل ۽ انهن کي معاشري ۾ جائز مقام ڏيارڻ لاءِ پوري طرح تيار آهن. هن چيو ته مون کي پورو يقين آهي ته اسان اتحاد ۽ اتفاق سان جلد هن ملڪ کي ترقي جي راهه تي ٻيهر گامزن ڪري وٺنداسين. وزيراعظم چيو ته اڄ جي ڏينهن اقليتن کي پنهنجي گلي لڳائڻ گهرجي، اقليتون جيڪي اسان جي آبادي جو ساڍا ٽي سيڪڙو حصو بڻجن ٿيون، انهن جي خدمتن کي قدر جي نگاهه سان ڏسڻ گهرجي ۽ انهن جي حوصلا افزائي ڪرڻ گهرجي. هن چيو ته منهنجي قائد محمد نواز شريف اقليتن لاءِ هميشه کلي دل جو ثبوت ڏنو آهي، جيستائين هو وزيراعظم رهيو مان وزيراعليٰ رهيس يا پاڪستان مسلم ليگ (ن) جو صدر ۽ قائد رهيو. هن هميشه هر جاءِ تي اقليتن جي ڳالهه ڪئي ۽ انهن جي حقن لاءِ پوري ريت آواز اٿاريو، اڄ جي ڏينهن ملهائڻ جو مقصد اقليتن کي اها خاطري ڪرائڻي آهي ته اسان پنهنجي ابن ڏاڏن جي عهد تي قائم آهيون ۽ دستور پاڪستان جي حوالي سان اوهان جا جيڪي آئيني حق آهن اهي آزادي جي حوالي سان هجن، قانوني تحفظ جي حوالي سان هجن يا جيڪو پاڪستان جي باني ۽ علامه اقبال جا فرمان آهن، انهن جي روشني ۾ وزيراعظم ۽ قائد محمد نواز شريف جي حوالي سان يقين ڏياريان ٿو. انشاالله هن ملڪ پاڪستان ۾ اوهان جي حقن لاءِ پوري ڪوشش جاري رکي ويندي. هن چيو ته اقليتن جي حفاظت لاءِ کين معاشري ۾ جائز مقام ڏيارڻ جي غرض سان پوري طرح تيار آهن ۽ اهو ئي سبب آهي ته پاڪستان نه رڳو ترقي ڪري سگهي ٿو پر خوشحالي سان همڪنار ٿي سگهي ٿو ۽ دنيا ۾ پنهنجو جائز مقام حاصل ڪري سگهي ٿو.