اسلام آباد۔31اکتوبر (اے پی پی):وزیراعظم عمران خان آکھیے جو پاکستان اتے سعودی عرب وچال تاریخی، پراݨے اتے بھرپی آلے تعلقات ہن جنہاں دیاں پاڑاں مشترکہ عقیدے، تاریخ اتے سانجھے تعاون تے مشتمل ہن، ݙوہیں ملک اوکھے ویلھے ھک ݙوجھے دے نال ثابت قدمی نال کھڑے رہیے ݙوہیں ملکاں ست ݙھاکیں توں خصوصی رشتے اچ گھنڈیے پئن ، سعودی عرب دا وژن 2030ء منصوبہ پاکستان کوں سعودی عرب دے نال نویں پاکستان دے منصوبہ کوں عملی جامہ پواوݨ کیتے ڳال مہاڑ دا موقع ݙیندے۔ اتوار کوں سعودی عرب دے الریاض اخبار کوں انٹرویو ݙیندے ہوئیں وزیراعظم آکھیے جو پاکستان سعودی عرب کوں آئی ٹی، انفراسٹرکچر دی ترقی اتے زراعت اچ آپݨی مہارت دا اشتراک کرݨ دے علاوہ ہنر مند اتے نیم ہنرمند افرادی قوت ݙے سڳدے ۔ وزیراعظم آکھیے جو پاکستان اتے سعودی عرب قیادت دی تبدیلی دی پراوہ کیتے بغیر ھک ݙوجھے دے رلے کھڑن ۔وزیراعظم آکھیے جو ماضی دے نال نال عصر حاضر اچ وی علاقائی اتے بین الاقوامی سطح تے تھیوݨ آلی پیش رفت دے تناظر اچ آپݨے تعلقات کوں بدالݨ دی کݙاہیں نوبت نی آئی، ݙوہیں ملکاں دے تعلقات اچ ثابت قدمی رہی اے۔ وزیراعظم آکھیے جو اے رشتہ ست ݙھاکیں دا اے ، اساݙی اے شدید خواہش اے جو ایں تعلق کوں ھک گہری ، متنوع اتے سانجھی سود مند تذویراتی شراکت داری اچ بدالیا ونڄے ، اساں تعاون دے نویں تے غیر روایتی شعبیں کوں گول تے تاریخی فیدے کوں مستحکم کرݨ کیتے کم کریندے پیوں ، اساں چاہندوں جو ساݙے تجارتی تعلقات اتے سرمایہ کاری اچ تعاون اساݙے بہترین تعلقات دے مطابق ہووے۔ وزیراعظم آکھیے جو سعودی عرب دے اڄوکے دورہ دے دوران انہاں کوں سعودی پاکستان سرمایہ کاری دے پہلے فورم اچ شرکت دا موقع ملیے جیں اچ انہاں تجارت دے شعبہ اچ استعمال اچ نہ گھن آئیاں ونڄݨ آلیاں صلاحیتاں دا ادراک کرݨ کیتے ݙوہیں ملکاں دے نجی اتے کارپوریٹ سیکٹرز کوں کاروبار اتے سرمایہ کاری اچ رلاوݨ دی اہمیت تے زور ݙتے ۔ ۔ ھک سوال دے ولدے اچ انہاں آکھیے جو وژن 2030ء دے تحت مختلف شعبیں اچ اصلاحات متعارف کراوݨ تے سعودی قیادت دی تعریف کریندوں ۔ وزیراعظم آکھیے جو انہاں دے اڄوکے دورہ سعودی عرب اچ وژن 2030ء دے تحت سرمایہ کاری دے موقع اقتصادی اتے تجارتی تعلقات کوں مضبوط بݨاوݨ کیتے مختلف طریقیں تے ڳال مہاڑ کیتی اے ۔ موسمیاتی تبدیلی تےسربراہ اجلاس دے حوالے نال انہاں آکھیے جو اے اجلاس موسمیاتی تبدیلی دے چیلنج نال نبݨݨ کیتے سعودی قیادت دے ٹھوس اقدامات دے عزم کوں ظاہر کریندے ۔
