بينظير ڪفالت پروگرام جي شروعات کان هن وقت تائين 7.9 ملين حقدارن ۾ 1.309 ٽريلين رپيا ورهايا ويا: شازيه مري

اسلام آباد-16 سيپٽمبر (اي پي پي) غربت جي خاتمي، سماجي تحفظ واري وفاقي وزير ۽ـ چيئرپرسن بينظير انڪم سپورٽ پروگرام شازيه مري چيو آهي ته بي آءِ ايس پي معاشري جي غريب ۽ پٺتي پيل طبقن جي فلاح ۽ بهبود لاءِ سڀ کان ڪامياب سماجي تحفظ جو پروگرام آهي، ملڪ ۾ هاڻوڪي ٻوڏ ۾ بي آءِ ايس پي ٻوڏ متاثرن ۾ 946,967 خاندانن ۾ 27645 ملين رپيا ورهايا. اهڙو اظهار هن بي آءِ ايس پي هيڊ ڪوارٽر اسلام آباد ۾ عالمي بئنڪ جي وفد سان ملاقات دوران ڪيو. ملاقات دوران وفد کي بينظير انڪم سپورٽ پروگرام تحت کنيل قدمن جي باري ۾ بريفنگ ڏني وئي. هن وفد کي ٻُڌايو ته بينظير ڪفالت پروگرام جي شروعات کان هن وقت تائين 7.9 ملين ڪٽنبن ۾ 1.309 ٽريلين رپيا ورهايا ويا. بينظير تعليمي وظائف تحت 8.04 ملين ٻارن ۾ 40 ارب رپيا ورهايا ويا. 92003 بينظير انڊر گريجوئيٽ اسڪالرشپس لاءِ 20.5 بلين رپيا ورهايا ويا ۽ بينظير نشوونما پروگرام تحت 196989 حقدارن کي 833 ملين رپيا ورهايا ويا آهن. هن چيو ته هن وقت بينظير نشوونما پروگرام 29 ضلعن ۾ ڪم ڪري رهيو آهي ۽ ملڪ جي ٻين ضلعن ۾ وڌيڪ سهولتي مرڪز قائم ڪيا پيا وڃن ته جيئن ڳورهاري، کير پياريندڙ عورتن ۽ ان جي 2 سالن کان گهٽ عمر جي ٻارن کي اسٽنٽنگ جي مسئلن تي قابو آڻي سگهجي. وفاقي وزير پاڪستان ۾ سماجي تحفظ جي نظام کي مضبوط بڻائڻ لاءِ ترقياتي شراڪتدار طور عالمي بئنڪ جي ڪردار کي بيحد ساراهيو. عالمي بئنڪ سماجي تحفظ جي نيٽ ورڪ ۾ اهم ڪردار ادا ڪري رهيو آهي. عالمي بئنڪ پاڪستان جي صحت ۽ تعليم بابت روڪ مالي معاونت جي پروگرامن تي توجهه ڏئي انساني سرمائي جي ترقيءَ ۾ پڻ مدد ڪئي آهي. هن وڌيڪ چيو ته اسان کي صوبن ۽ وفاق کي گڏ کڻي هلڻو آهي ته جيئن يقيني بڻائي سگهجي ته اسان سڄي ملڪ ۾ ٻوڏ متاثر سبب خاندانن کي امداد فراهم ڪرڻ ۾ ڪنهن کي پوئتي نه ڇڏي رهيا آهيون. عالمي بئنڪ جي نمائندن ٻوڏ متاثر علائقن ۾ بي آءِ ايس پي جي ڪوششن کي ساراهيو ۽ بينظير نشوونما جهڙن پروگرامن ۾ عالمي بئنڪ طرفان مڪمل تعاون جي خاطري ڪرائي. وفد بي آءِ ايس پي کي قومي سماجي ۽ اقتصادي رجسٽري کي اپ ڊيٽ ڪرڻ تي مبارڪباد پڻ ڏنيون. وفد ۾ هيومن ڊولپمينٽ سائوٿ ايشيا ريجن جي ريجنل ڊائريڪٽر محترمه لين شير برن بينز، پريڪٽس مئنيجر، سوشل پروٽيڪشن اينڊ جابس مسٽر اسٽيفانو پيٽرنسٽرو، پريڪٽس ليڊر هيومن ڊولپمينٽ مسٽر لائر ايرساڊو ۽ سينيئر سماجي تحفظ جو ماهر امجد ظفر خان پڻ شامل هو.

مضمون کا ماخذ : علاقائی کلیدی الفاظ

متعلقہ مضامین