اڈیالہ جیل آلے صاحب دے دور اچ پاکستان کلھیپے دا شکار ہئی ، ہݨ او معاملہ مک ڳئے ، خارجہ پالیسی دے خلاف ڳالھیں کرݨ آلے ماضی دا قصہ بݨ چکن، وفاقی وزیر اطلاعات عطاءاللہ تارڑ دی پریس کانفرنس

اسلام آباد۔23اپریل(اے پی پی):وفاقی وزیر اطلاعات و نشریات عطاء اللہ تارڑ آکھیے جو اڈیالہ جیل آلے صاحب دے دور اچ پاکستان کلھیپے دا شکار ہئی ، ہݨ او معاملہ مک ڳئے ، خارجہ پالیسی دے خلاف ڳالھیں کرݨ آلے ماضی دا قصہ بݨ چکن، انہاں اپݨی ذات دی خاطر ملک کوں ہمیشہ ضیان پڄاوݨ دی کوشش کیتی عوام نفرت اتے ونڈ دا بیانیہ مسترد کر ݙتے۔ وفاقی وزیر قانون اعظم نذیر تارڑ دے رلے پریس کانفرنس توں خطاب کریندے ہوئیں وفاقی وزیر اطلاعات آکھیے لاپتہ لوکاں دے حوالے نال وزیر قانون تفصیل نال روشنی پاتی اے ، دہشت گردی دے واقعات اچ شہید تھیوݨ آلیں دے لواحقین دے ایں بارے شدید تحفظات ہن ، انھاں لوکاں لک دی خاطر جاناں قربان کیتن ۔ انہاں آکھیے جو 2011 اچ سپریم کورٹ لاپتہ لوکاں بارے انکوائری کمیشن تشکیل ݙتا ہئی جیں دے تحت 10023 کیسز اچوں 7900 کیس حل تھی چکن ۔ صرف 23 فیصد کیس زیر التوا ہن۔ انہاں آکھیے حکومت ایں حوالے نال ٻہوں کم کیتے ساݙی نیت ایں مسئلے کوں حل کرݨا اے ۔ انہاں آکھیے جو وزیر قانون ماضی دی حکومت اچ وی ایں تے کم کیتے ول وی ایندے تے کم تھیندا پعے ۔ ضمنی انتخابات دے نتیجے دے حوالے نال ڳالھ مہاڑ کریندے ہوئیں وفاقی وزیر اطلاعات آکھیے ضمنی انتخابات اچ دھاندلی دا ڈھنڈورا پیٹیا ڳئے لیکن اللہ تعالیٰ دے فضل و کرم نال مسلم لیگ (ن) ضمنی انتخابات اچ کلین سویپ کیتے۔ انہاں آکھیے پاکستان دے عوام تحریک انصاف دے کوڑ ، تشدد، دفاعی اداریں دے خلاف بیانیہ کوں مسترد کرݙتے۔ انہاں آکھیے جو ضمنی انتخابات اچ مسلم لیگ (ن) دے ووٹرز سودھے ٻئے وی مسلم لیگ (ن) کوں ووٹ ݙتا۔ انہاں آکھیے ضمنی انتخابات دی شفافیت تے کوئی انگلی نی چا سڳدا ضمنی الیکشن 8 فروری دے انتخابات دے حوالے نال شکوک و شبہات کوں ختم کرݙتے ۔ انہاں آکھیے محمد نواز شریف نال لوکاں دی والہانہ محبت اے، عوام شہباز شریف دی معاشی اصلاحات اتے پنجاب اچ خدمت دی سیاست کوں ووٹ ݙتے انہاں آکھیے نفرت، منافقت اتے کوڑ دا بیانیہ مسترد تھی چکیے ۔

مضمون کا ماخذ : پاور بال کے نتائج

متعلقہ مضامین