آزاد ڪشمير جي حڪومت پوري رياست جي نمائنده حڪومت آهي: سردار تنوير الياس خان

مظفر آباد – 24 – آڪٽوبر (اي پي پي) آزاد حڪومت رياست ڄمون ۽ ڪشمير جي وزيراعظم سردار تنوير الياس خان چيو آهي ته آزاد ڪشمير جي حڪومت پوري رياست جي نمائنده حڪومت آهي، بيس ڪئمپ جي حڪومت ۽ عوام پنهنجي والاريل ڪشمير جي ڀائرن سان گڏ بيٺل آهي. حقيقي آزادي ان ڏينهن ٿيندي جڏهن والاريل ڪشمير به هندستاني قبضي کان آزاد ٿيندو. دنيا ياد رکي ته ڪشمير جو تڪرار زمين جي ٽڪڙي جو نه آهي پر ڏيڍ ڪروڙ انساني زندگين جو مسئلو آهي. آزاد حڪومت رياست ڄمون ۽ ڪشمير جو 75 هون يوم تاسيس اسان جي وڏن جي قربانين جي ياد ڏياري ٿو. 1947ع ۾ اسان جي وڏن ۽ مجاهدن هي خطو آزاد ڪرايو. اڄ جي ڏينهن آزاد ڪشمير جي عوام سان واعدو ڪريان ٿو ته توهان کي تبديل ٿيل آزاد ڪشمير ڏينداسين. پاڪستان جي هٿياربند فوج جي قربانين کي خراج عقيدت پيش ڪريون ٿا. هندستان شايد مسلمانن جي تاريخ کان واقف نه آهي. طاقت جي زور تي ڪشميرين جي تحريڪ کي نه ٿو دٻائي سگهجي. ڪشمير مسئلو حل نه ڪيو ويو ته پوءِ اسان وٽ اختيار آهي ته ڪو ٻيو رستو اختيار ڪريون. اهڙن خيالن جو اظهار هن آزاد حڪومت رياست ڄمون ۽ ڪشمير جي 75 هين يوم تاسيس جي موقعي تي گادي واري شهر مظفرآباد جي پريڊ گرائونڊ ۾ منعقد يوم تاسيس جي مرڪزي تقريب کي خطاب ڪندي ڪيو. تقريب جو خاص مهمان آزاد ڄمون ۽ ڪشمير جو وقتي صدر چوڌري انوارالحق هو. مرڪزي تقريب ۾ سينيئر موسٽ وزير خواجه فاروق احمد، حڪومتي وزيرن، اسيمبلي ميمبرن، چيف سيڪريٽري، انسپيڪٽر جنرل پوليس، سيڪريٽرين، سول ۽ عسڪري عملدارن کانسواءِ شهرين جي وڏي انگ شرڪت ڪئي. تقريب کي خطاب ڪندي وزيراعظم سردار تنوير الياس خان چيو ته چوڌري غلام عباس جهڙي عظيم اڳواڻن ان وقت جدوجهد جي قيادت ڪئي ۽ محسن ڪشمير غازي ملت سردار محمد ابراهيم خان جي سربراهي ۾ بيس ڪئمپ جي حڪومت قائم ٿي. جنهن عظيم مقصد جي لاءِ بيس ڪئمپ جي حڪومت جو قيام عمل ۾ آندو ويو ان کي مڪمل ڪرڻ جي لاءِ بيس ڪئمپ جي حڪومت پنهنجو ڀرپور ڪردار ادا ڪندي. هن چيو ته هندستان جي حڪومت آر ايس ايس جي ايجنڊا تي عمل ڪري رهي آهي، عالمي دنيا، يو اين ۽ او آءِ سي سميت ٻين عالمي ادارن کان مطالبو ڪريون ٿا ته گڏيل قومن جي قراردادن تي عملدرآمد ڪرايو وڃي. والاريل ڪشمير ۾ هندستان انساني حقن جون بدترين پائماليون ڪيون آهن، حريت قيادت کي جيلن ۾ رکيو ويو آهي. هن چيو ته باباءِ قوم قائداعظم محمد علي جناح ڪشمير کي پاڪستان جي شهه رڳ قرار ڏنو، پوري پاڪستاني قوم ڪشميرين سان گڏ بيٺل آهي. اسان جي حڪومت ڪشمير جي آزادي جي تحريڪ لاءِ قرباني جا عظيم داستان لکندڙ ڪيپٽن سرور شهيد جو يوم شهادت ڀرپور انداز سان ملهايو. وزيراعظم سردار تنوير الياس خان چيو ته آزاد خطي ۾ گڊ گورننس لاڳو ڪرڻ جي لاءِ سمورا قدم استعمال ۾ آڻي رهيا آهيون، آزاد ڪشمير جي عوام سان واعدو آهي ته توهان کي تبديل ٿيل ڪشمير ڏينداسين.

مضمون کا ماخذ : کمپیوٹر لاٹری کا جیک پاٹ

متعلقہ مضامین