ایڈمرل محمد امجد خان نیازی پاک بحریہ دی کمان سانبھ گھدی

اسلام آباد۔7اکتوبر (اے پی پی) ایڈمرل محمد امجد خان نیازی ہلال امتیاز (ملٹری) ستارہ بسالت 22ویں چیف آف دی نیول اسٹاف دے طور تے پاک بحریہ دی کمانڈ سانبھ گھدی ۔ تبدیلی کمانڈ دی پروقار تقریب پی این ایس ظفر، اسلام آباد اچ منعقد تھئی جتھاں ایڈمرل ظفر محمود عباسی نشان امتیاز (ملٹری) اپنڑی مدت ملازمت دے اختتام تے پاک بحریہ دی کمانڈ ایڈمرل محمد امجد خان نیازی دے حوالے کیتی۔ پاک بحریہ دے افسران اتے نینگراں توں آپنڑے الوداعیہ خطاب اچ سبکدوش تھیونڑ آلے نیول چیف ایڈمرل ظفر محمود عباسی کوں زبر دست خراج تحسین پیش کیتا۔ایڈمرل ظفر محمود عباسی آپنڑے خطاب اچ اللہ تعالیٰ دیاں عنایتاں دا شکر ادا کیتا جنہاں دی بدولت انھاں پاک بحریہ دی کمانڈ بہترین انداز اچ انصاف، ایمانداری اتے وقار دے نال مکمل کیتی ۔انہاں آکھیے جو انہاں دا بنیادی مقصد پاک بحریہ کوں ہر ویلھے تیا ر فوج بنڑاونڑ ہئی جیں دا دارومدار بہترین جنگی تیاری اتے پیشہ وارانہ مہارت تے ہووے۔ انھاں آپنڑے وژن دیاںمختلف جہتاں دی تکمیل کیتے پاک بحریہ دے افسراں تے نینگراں ولوں دی محنت دی تعریف کیتی ۔ ایڈمرل ظفر محمود عباسی گزریل سالاں اچ غیر مستحکم جغرافیائی و سیاسی صورتحال اتے ودھدی کشیدگی بارے گال کریندے ہوئیں پلواما واقعہ دے بعد دی صورتحال دا خصوصاً ذکر کیتا۔ انھاں آکھیے جو پاکستانی عوام اتے فوج دے مشترکہ موقف اتے اینکوں سفارتی و ملٹری سطح تے اجاگر کرنڑ نال بھارت دے ارادے خاک اچ رلاڈتے گے۔ پاکستان دی مسلح فوج بھارتی عزائم دا منہ بھن جواب ڈتا ،انہاں پاکستان دے سمندر اچ دراندازی دی کوشش کرنڑ آلی بھارتی آبدوز کوں وٹھنڑ تے پاک بحریہ دی پیشہ ورانہ صلاحیتاں دی تعریف کیتی۔ ایڈمرل ظفر محمود عباسی پاک بحریہ دی کمانڈ سنبھالنڑ تے ایڈمرل محمد امجد خان نیازی کوں مبارخ ڈتی ۔ انھاں نویں نیول چیف کیتے نیک خواہشات دا اظہار کریندے ہوئیں آکھیا جو انہاں دی سربراہی اچ پاک بحریہ بلندی دے نویںمرحلے طے کریسی ۔ایڈمرل عباسی کمانڈ دی سپردگی دے موقع تے اپنڑے فرائض دی ادائیگی اچ مکمل معاونت تے حکومت پاکستان، وزارتِ دفاع، جوائنٹ سروسز ہیڈکوارٹرز اتے بئی مسلح فوج دا دلوں شکریہ ادا کیتا ،ایندے توں پہلے سبکدوش تھیونڑ آلے نیول چیف کوں گارڈ آف آنر پیش کیتا گیا۔ ایڈمرل ظفر محمود عباسی روایتی اسکرول پیش کر یندے ہوئیں پاک بحریہ دی کمانڈ ایڈمرل محمد امجد خان نیازی دے حوالے کیتی ۔تبدیلی ِ کمانڈ دی تقریب اچ پاک بحریہ دے سابق سربراہان، حاضروریٹارڈ افسران، سی پی اوز/سیلرز اتے نیوی سویلینز شرکت کیتی۔ بعد اچ، امیر البحر محمد امجد خان نیازی نیول ہیڈکوارٹرز اچ یادگارِشہداءتے پھلاں دی چادر چڑھائی تے فاتحہ خوانی کیتی۔ نیول ہیڈکوارٹر آمد تے چاوق و چوبند دستے نویں امیر البحر کوں سلامی پیش کیتی۔ چیف آف دی نیول اسٹاف ایڈمرل محمد امجد خان نیازی پاک بحریہ دی آپریشنزبرانچ اچ 1985اچ کمیشن حاصل کیتا۔ اعلی صلاحتیاں دے پیش نظر اعزازی شمشیر حاصل کرنڑ آلے ایڈمرل محمد امجد خان نیازی کوں کمانڈ اتے اسٹاف عہدیں دا ودھ تجربہ اے۔ انہاں دی کمانڈ تقرریاں اچ ڈو Type-21 جہاز پی این ایس بدر اتے پی این ایس طارق دی کمانڈ، اٹھارویں ڈسٹرائر سکواڈرن دی کمانڈر، کمانڈانٹ پی این ایس بہادر، کمانڈانٹ پاکستان نیوی وار کالج /کمانڈر سنٹرل پنجاب، کمانڈر پاکستان فلیٹ اتے کمانڈر کراچی شامل ہن۔انہاں دی اہم اسٹاف تقرریاں اچ چیف آف دی نیول اسٹاف دے پرنسپل سیکریٹری، ہیڈ آف F-22P مشن چائنہ، ڈپٹی چیف آف نیول اسٹاف(ٹریننگ اینڈ ایوالیوایشن)، ڈائریکٹر جنرل نیول انٹیلی جنس اتے چیف آف اسٹاف (آپریشنز) شامل ہن۔ ایڈمرل محمد امجد خان نیازی آرمی کمانڈ اینڈ اسٹاف کالج کوئٹہ اتے نیشنل ڈیفنس یونیورسٹی اسلام آباد دے گریجویٹ ہن۔ چین دی بیجنگ یونیورسٹی آف ایروناٹکس اینڈ ایسٹروناٹکس توں انڈر واٹر ایکوسٹکس اچ ماسٹرز ڈگری وی حاصل کیتی اے ۔ انہاں دی اعلی خدمات دے اعتراف اچ انہاں کوں ہلالِ امتیاز(ملٹری) اتے ستارہِ بسالت دے اعزاز نال نوازیا گئے ۔انہاں کوں حکومتِ فرانس ولوں فرانسیسی میڈل شیولیئر نائٹ وی ڈتا گئے۔

مضمون کا ماخذ : لاٹوفاسیل

متعلقہ مضامین