اسلام آباد۔3مارچ(اے پی پی) الیکشن کمیشن سپریم کورٹ آف پاکستان دے فیصلے دی روشنی اچ صدر مملکت کوں چٹھی ارسال کیتی اے جیں اچ صوبہ پنجاب دے انتخابات دے انعقاد کیتے 30اپریل توں 7مئی 2023 تئیں دی تاریخاں تجویز کیتیاں ڳئن ۔ جمعہ کوں الیکشن کمیشن آف پاکستان توں جاری بیان موجب چیف الیکشن کمشنر سکندر سلطان راجہ دی سربراہی اچ الیکشن کمیشن دا اجلاس منعقد تھیا جیں وچ معزز ممبران الیکشن کمیشن دے علاوہ الیکشن کمیشن دے سینئر افسران شرکت کیتی۔ الیکشن کمیشن سپریم کورٹ آف پاکستان دے فیصلے دی روشنی اچ صدر مملکت کوں چٹھی بھیڄی اے جیں اچ صوبہ پنجاب دے انتخابات دے انعقاد کیتے 30اپریل توں 7مئی 2023 تئیں دیاں تاریخاں تجویز کیتن ۔ صدرمملکت دی طرفوں تاریخ دے انتخاب توں بعد الیکشن کمیشن اپݨے آئینی اتے قانونی فرائض انجام ݙیوݨ کیتے تیار اے ۔ الیکشن کمیشن گورنرخیبر پختونخوا کوں وی مراسلہ بھیڄے ، جیں اچ تحریر کیتا ڳئے جو سپریم کورٹ آف پاکستان دے احکامات دی روشنی اچ الیکشن کمیشن تساݙے جواب دا منتظر اے۔